Job 40

1 UJehova wathi kuJobe:

2 “Lowo ophikisana loSomandla angamqondisa na? Yena lowo obeka uNkulunkulu icala kamphendule!”

3 Yikho uJobe wasephendula uJehova wathi:

4 “Kakungilingananga – ngingakuphendula njani na? Ngivala umlomo wami ngesandla sami.

5 Ngikhulumile kanye, kodwa kangilampendulo – kabili, kodwa kangisayikukhuluma njalo.”

6 Kwathi uJehova wakhuluma kuJobe ephakathi kwesiphepho wathi:

7 “Ziqinise njengendoda; ngizakubuza, wena ungiphendule.

8 “Ungakusola na ukwahlulela kwami okuhle? Ungangilahla ukuze uzigeze na?

9 Ulayo ingalo enjengekaNkulunkulu na, njalo ilizwi lakho lingaduma njengelakhe yini?

10 Uma kunjalo zicecise ngobukhosi langenkazimulo, uzembathise ngodumo lobukhosi.

11 Khulula ukuvutha kolaka lwakho, khangela wonke umuntu ozigqajayo umthobise,

12 khangela wonke umuntu ozigqajayo umbeke phansi, ubahlifize ababi khonapho abakhona.

13 Bambele bonke ndawonye othulini; goqela ubuso babo engcwabeni.

14 Lapho-ke lami ngizavuma kuwe ukuthi isandla sakho sokunene singakusindisa.

15 “Khangela imvubu, engayenzayo kanye lawe njalo edla utshani njengenkomo.

16 Ilamandla amangalisayo okhalweni lwayo, amandla angaka emisipheni yesisu sayo!

17 Umsila wayo uyazunguza njengomsidari; imisipha yemilenze yayo yalukene.

18 Amathambo ayo alezimbobo zethusi, lezitho zayo zinjengemiqwayi yensimbi.

19 Iyingqala yezidalwa zikaNkulunkulu, kodwa uMenzi wayo angayehlula ngenkemba yakhe.

20 Izintaba zimlethela izithelo zazo, kuthi zonke izilo zeganga zidlalele eduze.

21 Ilala ngaphansi kwezihlahla ezibukekayo, isithekile phakathi kwemihlanga exhaphozini.

22 Izihlahla ezinhle ziyayisitha ngemithunzi yazo; imidubu emakhunjini omfula iyihonqolozele.

23 Nxa umfula uthwele izikhukhula kayethuki; kayithi thiki lokuba iJodani ithululela izimphophoma emlonyeni wayo.

24 Ukhona yini ongayibamba ngamehlo, kumbe ayithiye ayibhoboze amakhala na?